መልእኽቲ ሓድሽ ዓመት፡ 2021 ዓመተ ምህረት፡ ነዞም ክልተ ኮረና እትስውር፡ ርሕስቲ ሓዳስ ዓመት ንግበራ!!

2021 ዓመተ ምህረት፡ ነዞም ክልተ ኮረና እትስውር፡ ርሕስቲ ሓዳስ ዓመት ንግበራ!!

2020 ዓመተ-ምህረት፡ ነቲ ዝማዕበለ ሕብረተሰባት ዓለም ከይተረፈ ዘዋለአ ቀዛፊ ለበዳ ኮረና-ቫይረስ ሒዛ ብኸቢድ ብድሆ ምስ ፈለመት፡ ንዓና ነቶም ኣብ ስደት እንነብር ኤርትራውያን ብሕልፊ፡ እቲ ሕማም፡ ንብዙሓት ኣባላት ማሕበረኮምናን እቶም ከም ስደተኛታት ዘእንገዱና ህዝብታትን መዓልቲ መዓልቲ ብጅምላ ሞት እናወሰደ ኸሎ፡ ብዝያዳ ዘሻቐለና፡ ናይቲ ኣብ ውሽጢ ኤርትራ ዘሎ ውጹዕ ህዝብና ኩነታትን ዕድልን እዩ ።

ምኽንያቱ፡ እቶም ህዝባውን ትካላውን ተሓታትነት ዘለዎም ሓላፍነታውያን መንግስታት ናይተን እንነብረለን ሃገራት፡ ነቲ ምስጢሩ ዘይፈለጡዎ፡ ኣዝዩ ዘሰንበዶም ለበዳ ሕማም፡ ከም ናይ 100 ዓመት ጸላኢ ብቐዳምነት ርእዮም፡  ጸጋታቶም ብምሉኡ ናብቲ ጥዕናዊ ቅልውላው ኣቕኒዖም ህዝቦም ንምድሓን፡ ብሕክምናዊ መዳይ መኪቶም ሞት ንምውሓድ ጥራይ ዘይኮነ፡ ንቑጠባውን ማሕበራውን ስነኣእሙራኣውን ሳዕቤናቱ `ውን ዝዓምም፡ ሓቀኛን እሙንን ጻዕሪ ከካይዱ ብምርኣይና፡ `ነዚ ጻዕርን ተገዳስነትን ሰጊሩ ዝበጽሕ ሞት ይምጻእ፡ ሞት ከም ኣዳም` ብምባል፡ በንጻሩ፡ በቲ ኣብ ውሽጢ ሃገር ዝነበር ዘሎ፡ ካብ ድሕረት ሕክምናዊ ትካላቱ ንላዕሊ፡ ድሕረት ኣተሓሳስባ ናይቲ ህዝባውን ትካላውን ተሓታትነት ይኹን ፋዕራ ህይወት ዘይብሉ ሓላፍነት ዘይስምዖ ምልካዊ ስርዓት ኢሳይያስ ዝሳቐ ዘሎ ህዝብና ክንሻቐል ባህርያዊ እዩ ነይሩ።

ጽቡቕ ዕድል ኮይኑ ግን፡ ኣምላኽ ንህዝቢ ኤርትራ፡ `ጥምየቱን መከራኡን ዓመጹን ይኣኽሎ` ኢሉ ግዳይ ድርብ ወጽዓ ኣይገበሮን። ዓለም እናተቐዝፈት ከላ፡ ህዝቢ ኤርትራ፡ ብኮረና ቫይረስ-2019 ዝወረዶ ማህሰይቲ፡ ካብቲ ዝተፈርሐ ኣዝዩ ዝቐለለ እዩ።

እቲ ብኮቪድ-91ዝፍለጥ ናይ ኤርትራ ብሕታዊ ኮረና ግን፡ ነቲ ኣምላኽ ዘቕለሎ መዓት፡ ብናይ ገዛእ ርእሱ ጻዕሪ ከምዝተረኸበ ድሕነት ገይሩ ተመኪሑን ተጃሂሩን ስቕ ኣብ ክንዲ ዝብል፡ ነቲ ብሰማይ ዝተረኽበ ምሕረት ኣብ መሬት ብጥፍኣት ክድምስስ፡ ንመሳኪን መንእሰያት ኤርትራ ዶባት ኤርትራ ኣስጊሩ ኣብ ዘይምልከቶም ኲናት ትግራይ ጠቢሱ ኣደዳ መቕዘፍቲ ክገብሮም ከምዝወረሐ፡ ነቲ ኣብ ገግዝኡ ጽባሕ ጽባሕ መርድእ ዝመጽኦ ዘሎ ህዝቢ ኤርትራ ካልኣይ መርድእ ዘድልዮ ኣይኮነን።

እንተኾነ ግን፡ ኣየርእየሉ፡ እቲ ንህዝቢ ኤርትራ ካብ ማንም ጋዕገልጥም ንታሕቲ ዘሕሰረን ዘዋረደን ፋሽሽታዊ ውልቀመላኺ ኢሳይያስ፡ `ፕረዚደንት` ተባሂሉለይ `ያኢ፡ `ክቡር ህዝቢ ኤርትራ ኢሉ` ካብ ውሻጠ ኣብ ዘመሓላለፎ መልእኽቲ ሓድሽ ዓመት፡  `2020፥ ምስ ዓለማዊን ዞባዊን ውህሉል ነውጺ፣ ህልቂታዊ ለበዳ ኮቪድ-19 ተወሲኹዋ፣ ኣብ ታሪኽ ሰባት፣ ከቢድ ቅልውላው ዝገዝኣ ዓመት’ያ ነይራ።` ክብል፡ ነቲ ተረፍ ናይቲ በብዓመቱ፡ ሓንሳብ ብሱዳን፡ ሓንሳብ ብየመን፡ ሓንሳብ ብኢትዮጵያ፡ ሓንሳብ ብጅቡቲ ብዙርያ ኤርትራ ዝወለዖ ውግኣትን ስደትን ዝኾነ መንእሰይ ኤርትራ ዳግም ዓይኑ ዓሚቱ ኣብ ዘይእዉጅ ኲናት ኣእትዩ፡ መጽሓፍ ዘይኣኽሎ ጸሊም ታሪኽ ጽሒፉ ክንሱ፡ ነቲ ምስ 2020 ተዘራርዩ ዝፈጸሞ ብዘይካ ኣብ ገሃነብ ኣብ ካልእ ሰፈር ዘይርከቦ ሓጥያት ብቑንጣሮ ቃላት ኣቃሊሉ ክሓልፎ ፈቲኑ `ሎ።

ኣብዞም ዝሓለፉ 30 ዓመታት፡ ኮነ ኢሉ ክብልሎም ንዝጸንሐ ክብርታት ህዝቢ ኤርትራ፡ ኣብ 2020 ዓመተ ምህረት ሳላ ስሕለተ-ራእይኡ ከም ዘትብዖምን ከምዝሰሓሎምን ኣምሲሉ `ውን ክምካሕ ተረእዩ።

እንተኾነ፡ 2020፡ ብሰንኪ `ቲ ዝቕይዶ ባይቶን ቅዋምን ዘይብሉ ዓንዳሪ ውልቀመላኺ ኢሳይያስ፡ እቲ ኩሉ መዳያዊ ልምሰት ኣጋጥሙዎ ኣብ ጸድፊ ተንተልጢሉ ክንሱ፡ ህዝቢ ኤርትራ፡ ምስ ኣምላኽ ዘራኽብ ፈትሊ `ኣለኒ` ኢሉ ከም ናይ መወዳእታ ተስፋ ተጸጊዑሉ ንዝነበረ ሰብኣውን ማሕበራውን ክብርታት ዝቐበረላ ዓመት `ውን እያ ነይራ።

ኢሳይያስ፡ ሓደ ካብቶም ኣብ ዓለምና ዝነበሩ ዘለዉ ጨካናት ኣጋንንቲ ምዃኑ ዘማጒት `ኳ እንተዘይኮነ፡ እቲ ካብ ዓለም ዝጎርሐ ሰብ ምዃኑ ዘለዎ መረዳእታ ግን ዝንቡዕ እዩ። እንሆ ድማ፡ እቲ ቴለፎንን ኢንተርነትን እንተተዓጽዩ `ዝርእየኒ የለን፡ ድላየይ ክገብር `የ፡ ኣብ ባይታ ክዉንነት ምስ ተፈጥረ ኸኣ ንደሊኡ` ኢሉ፡ ንህዝቢ ኤርትራ ኣጸልሚቱ፡ ንሰራዊት ኤርትራ ምስ ጦርሰራዊትን ምልሻታት ኣምሓራን ኣላፊኑ ኣብ ልዕሊ ህዝቢ ትግራይ ዝፈጸሞን ዝቕጽሎ ዘሎን ህዝቢ ናይ ምንብርካኽን ዓሌት ናይ ምጽናትን ወራር፡ ህዝቢ ትግራይን ህዝቢ ኤርትራን ጥራይ ዘይኮነ ዓለም ብዓለሙ ኣዳዕዲዑ ፈሊጡዎ፡ ነቲ ተፈጺሙ ዘሎ ገበናት ኲናት ኣጽኒዑ ንምውሳን ድሮ ነጻ መርመራ ክካየድ ይጽውዕ ኣሎ።

ውልቀመላኺ ኢሳይያስ፡ ኣብ ልዕሊ ህዝቢ ኤርትራ ገበናት ኣንጻር ሰብኣውነት ከምዝፈጸመ ኣቐዲሙ ብኣህጉራዊ ደረጃ ተፈሪዱ `ኳ እንተኾነ፡ ኣይተቐጽዐን። ነዛ ኣብ ጸቢብ ረብሓ እትምርኮስ ዓለም፡ ኣብ ርእሲ `ቲ ካልእ ጂኦ-ፖለቲካዊ ጠቕምታታ፡ ልኡምነት ኤርትራውያን ዕሽሽ ክትብሎ ተወሳኺ ምኽንያት ከምዝኾና ግን ዝክሓድ ኣይኮነን።

ኣብዚ እዋን`ዚ፡ ተግባራውነትን ውጺእትን ኣህጉራዊ መርመራ ብዘየገድስ፡ እንተኾነ `ውን ከም ቦናስ ዝርአ ኮይኑ፡ ህዝቢ ኤርትራን ህዝቢ ትግራይን ብዘየማትእ መንገዲ፡ ውልቀመላኺ ኢሳይያስ ብዘይ ወዓል ሕደር ክጠፍእ ዘለዎ ናይ ሓባር ጸላኢኦም ምዃኑ ብዘየማትእ መንገዲ ኣረጋጊጾም ፈሊጦም ምህላዎም፡ ኣብዚ ድቕድቕ `ዚ ጸላም ዝተኸስተ ብልጭታ-ብርሃን ኮይኑ፡ ነዚ ሓባራዊ ቃልሲ ንምክያድ ዘኽእሎም መድረኽ ክጥቀሙሉ ግዴታን ሓላፍነትን ኣለዎም።

ዓንዳሪ ውልቀመላኺ ኢሳይያስ፡ ኣብቲ ኣብ 2020 ዓመተ ምህረት ፍሒሩዎ ዘሎ ጉድጓድ ኣብዛ ሓዳስ ዓመት 2021 ዓመተ ምህረት ተቐቢሩ፡ ህዝቢ ኤርትራን ህዝቢ ትግራይን፡ ካብ ጥፍኣትን ዕንወትን ድሒኑ ጸጋታት ሰላም ከስተማቕር፡ ኣብ ጎደና ልምዓትን ስልጣኔን ብሓባር ክስጉም መታን፡ ብህዝቢ ኤርትራ ክውሰድ ዘለዎ ናይ መጀመርያ ስጉምቲ ግን ኣሎ።

ንሱ ድማ፡ ነቲ ውልቀመላኺ ኢሳይያስ ኣብ መንጎ ህዝቢ ኤርትራን ህዝቢ ትግራይን ዘሎ ጽልኢ ኣዕብዩ ዕድመ ስልጣኑ ብምንዋሕ፡ ብዓቢኡ ምስ ኣቢይ ኣሕመድን ጥሩፋት ኣምሓራን ዝኣለሞ ውዲት ምልሓቕ ልኡላውነት ኤርትራ ንምስላጥ፡ ሰራዊት ኤርትራ ኣብ ትግራይ ኣዝሚቱ ኮነ ኢሉ ኣብ ልዕሊ ሰላማዊ ህዝቢ ዝፍጽሞ ዘሎ ቅትለት፡ ዓመጽ፡ ራስያን ስርቅን ብዘይ ነግፈረግ ብምዂናን፡ ነቲ ኣብ ልቢ ህዝቢ ትግራይ ዝውህለል ዘሎ ምረትን ጽልእን ቂምታን ቀልጢፉ ክውሕጦ ኣለዎ። ወራሪ ሰራዊት ኤርትራ ካብ መሬት ትግራይ ብቕጽበት ክወጽእ `ውን ብዓውታ ክጽውዕ ይግባእ። እዚ ምስ ዝግበር ጥራይ እዩ፡ እቲ ሓባራዊ ቃልሲ ዘተኣማምን ግንባር ፈጢሩ፡ ንውልቀመላኺ ኢሳይያስን መላፍንቱን ጸራሪጉ፡ ነዚ ክልቲኡ ህዝብታት ዘቕስን ናይ ሓባር መጻኢ ከውሕስ ዝኽእል።

ውጹዕ ህዝቢ ትግራይ `ውን ኣብዚ መሪር ፈተነኻ፡ ክትርድኣልና እንደልዮ ሓደ ነገር እንተልዩ፡ ኢሳይያስን ዓሻክሩን፡ ነቲ ካብ ክብርታትካ ዘይፍለ ጣዕሚ ዘለዎ ህዝቢ ኤርትራ ዘየንጸባርቑ ጽኪ ህዝቢ ኤርትራ ምዃኖም ተገንዝቢካ፡ ንጽልእን ቅርሕንትን ቦታ ካብ ምሃብ ክትጥንቀቕ፡ ከምቶም ኣብ መንጎ `ዚ ክልቲኡ ህዝብታት ጽልኢ ፈጢሮም ንብዙሕ ዘበናት ጎይቶት ዝኾኑልና ገዛእቲ ንኢሳይያስ ጽዋእ ዓወት ከይተጨብጦ ከምቲ እትገብሮ ዘለኻ ትዕትስኻን ልቦናኻን ክትቅጽሎ ንላበወካ። ደምካ ኣብ መሬት ትግራይ ክፈስስ ከሎ፡ ህዝቢ ኤርትራ ደም ይጥዕሞ ምህላዉ፡ ዕንወትካን ራስያኻን ሓባራዊ ዕዳ ምዃኑ፡ እቲ ዝዓበየ ሕነና እቲ ብናይ ሓባራ ቃልሲ ኣብ ልዕሊ ኢሳይያስን ኣሻክሩን እነመዝግቦ ዓወት ምዃኑ ልቦናኻ ከምዘይስሕቶ፡ እምነትና ምዃኑ ነዘኻኽረካ።

እቶም ዝቐተሉ፡ ዝዓመጹ፡ ዝራሰዩ ጥራይ ዘይኮነ፡ እቶም ምስክርነት ደቆምን፡ ኣሕዋቶምን ኣቦታቶምን እናሰምዑ፡ ወጽዓኻ ዝኽሕዱ ዘለዉ ሒደት ሃሱሳት፡ ካብቲ ቀንዲ ጸላኢ ከይፈለና ሓቢርና ክንቃለሶምን ክንስዕሮምን ምዃና ነረጋግጸልካ።

ኣብ ሜዳ ትግራይ እተካይዶ ዘለኻ ዘሐበን መኸተ፡ መርገጺ እግሪ ናይቲ ኣጸቢቑ ክበራበር ትጽቢት ዝግበረሉ ኤርትራዊ መኸተ ኮይኑ፡ ከምቲ 1991 ግብኣተ-መሬት መግዛእቲ ደርግ ዝተረጋገጸላ፡ እዛ እትኣቱ ዘላ ሓዳስ ዓመት 2021 `ውን ብርግጽ፡ ውልቀመላኺ ኢሳይያስን መሻርኽቱን ብናይ ሓባር ቃልሲ ተሳዒሮም ፍትሒ ህዝቢ ኤርትራን ትግራይን ዝነግሰላ ዓመተ ሰላምን ራህዋን ክትከውን `ያ።

2021 ዓመተ ዓወትን ሰላምን ራህዋን ይግበረልና!

ምልኪ ይፍረስ ሕጊ ይንገስ!!

ኣማኑኤል ኢያሱ

31 ታሕሳስ 2020