ጻውዒት ባይቶ ይኣክል ከተማ ሎንዶን ንኹሉ ግዱስ ኤርትራዊ ነባሪ ዓባይ ብሪጣንያ

 ጻውዒት ባይቶ ይኣክል ከተማ ሎንዶን ንኹሉ ግዱስ ኤርትራዊ ነባሪ ዓባይ ብሪጣንያ

ዝኸበርክንን ዝኸበርኩምን ደቂ ሃገርና፥ ባይቶ ይኣክል ከተማ ሎንዶን ንዕለት 06 ነሓሰ 2020 ዓ.ም.ፈ. ካብ ሰዓት 01:00 ድ.ቀ. – 04:00 ድ.ቀ. ኣብ ከተማ ሎንዶን ኣፍደገ ወጻኢ ጉዳያት ዓባይ ብሪጣንያ ሰፊሕ ሰላማዊ ሰልፊ ክነካይድ መዲብና ኣሎና።

ዕላማ ሰላማዊ ሰልፊ

ኩላትና ከም እንፈልጦ፥ ህዝብና ብምኽንያት ኮሮና ቫይረስ ምንቅስቓሳቱ ተዓጽዩ ብዘይ እኹል ቀረብ ማይን መግንብ ኣብ ዓብይ ሓደጋ ይርከብ ኣሎ። እዚ ብቐደሙውን ሓልዮት ህዝብን ሃገርን ዘይነበሮ ምልካዊ ስርዓት ንህዝብና ከጽንት ዝተፈላለየ ሜላታት ክጥቀም  እዃ  ኣንተ ጸንሔ እንሆ ሕጂ ግን ምቹእ ኣጋጣሚ ረኺቡ ብሽም ምክልኻል ኮሮና ቫይረስ  ህዝብና ምንቅስቓሳቱ ብምርጋጥ ኣብ ሓደጋ ጥምየት የእትይዎ ይርከብ፣ ንሕና ካብ ሃገር ወጻኢ ዘሎና ኤርትራውያን ንማሕበረሰብ ዓለም ከነእውየሉን፣ ኣብ ሃገርናን ህዝብናን ዘለና ተገዳስነት ብምርኣይ ነቲ ውጹዕ ህዝቢ ተስፋን ጸግዕን ክንኮኖ ግቡእናን ሓላፍነትናን እዩ።

ብተወሳኺ ንበዓል ነጎዳ ብሓዊ ደብሶ ከምዝበሃል ህዝብና ዘለዎ ሽግር ከይኣኽሎ ምልካዊ ስርዓት ህግደፍ ብዶብ ኣሳቢቡ ዘየለ ምኽንያት ፈጢሩ ንህዝብና ብፍላይ ከኣ ንመንእሰያት የሕዋትና ኣብ ዳግማይ ዂናት ንኽጠብስ፡ ምስቶም ቃንዛና ዘይስምዖም ህዝብና ኣጽኒቶም መሬትናን ባሕርናን ደልዮም ንመዋእል ዘድመዩና ተሻሪኹ መጋርያ ዂናት ክኣጉደልና ይሸባሸብ ኣሎ፡ ስለዝኾነ ኸኣ ነዚ ንጥፍኣትና ዝህረም ዘሎ ነጋሪት ኲናት ደው ከነብሎ ድምጽና ከነስምዕ፡ እምቢ ንዂናት እወ ንሰላም ክንብል እዋኑ ዝጠልቦ ግዴታ ኣለና። ኣፍንጫ ተሃሪማ ዓይኒ ትነብዕ ስለዝኾነ፡ ቃንዛ ህዝብና ቃንዛና መድመይቲ ህዝብና መድመይትና እዩ እሞ፡ ብእንታይ ገደሸኒ ሃገራዊ ግቡእና ከይንዝንግዕ ሓደራ ሓደራ ሓደራ ንብል።

ኣብዚ ህዝብና ዝበልዖን ዝሰትዮን ስኢኑ ብጥሜት ዝሳቐየሉ ዘሎ እዋን ኲናት ምውላዕ ንህዝብና ኮነ ንጎረባብትና ከምዘየርብሕ ተገንዚብና ነቲ ኲናት ዝጽሕትር ዘሎ ስርዓት ህግደፍ ብሓደ ድምጺ ክንኩንን ደጊምና ንጽውዕ።

ስለዚ ክቡራት ኤሪትራውያንን ፈተውቲ ኤሪትራውያንን ነዚ ክልተ ዓበይኢ ዕላማታት ዘለዎ ሰለማዊ ሰልፊ ዕዉት ክኸውን ናይ ኩላትና ኣበርክቶ ስለዝሓትት፡ ኣብ ትላፋርጓር ስኰር (Trafalgar square) ተራኺብና ብሰልፊ ናብ ኣፍ ደገ ቤት ጽሕፈት ወጻኢ ጉዳያት Foreign office, King Charles Street, London SW1 A 2AH ብሰልፊ ክንከይድ ልክዕ ስዓት 01:00 ድ.ቀ.  ኣብ መበገሲ ቦታ ክንራኸብ ብኽብሪ ንጽውዕ።

ኣብ ካልእ ሃገራት ትነብሩ ግዱሳት ኤርትራውያንን ፈተውቲ ህዝቢ ኤርትራን፣ ነዚ ኣጨናቒ ኩነታት ህዝብና ኣብ ዘዘሎኹሞ ንዝምልከቶም ኣላካት ድምጽኹም ከተስምዑ በዚ ኣጋጣሚ ነዘኻኽር።

ኣኽበርትኹም፥

ባይቶ ይኣክል ከተማ ሎንዶን