ክቡር ህዝቢ ኤረትራ፡ ክቡራት ኣሓተይ ኣሕዋተይ፡ ደቀይ ደቂ ደቀይ – ኣበባ ተስፋጊርጊስ

Januart 7, 2021

ክቡር ህዝቢ ኤረትራ፡ ክቡራት ኣሓተይ ኣሕዋተይ፡ ደቀይ ደቂ ደቀይ፡

ኣቀዲመ እዛ ሓድስ ዓመት፡ ዓመተ ምሕረት 2021፡ ሻቅሎትን፡ዉግእን፡ወረ ዉግእን፡ ኩሉ ዓይነት  ሓሳረ መከራን  ኣኽቲሙ፡ ዓመት ሰላም፡ ዓመት ፍቅሪ ዓመት፡ ቅሳነት፡ ዓመት ጥዕና ክትኮነልና  እንዳተመንኹ ሰላምታይ የቅርብ። ቀጺለ ድማ፡ ኩላትና ከም ንፈልጦ፡ 2020  ቀዛፊት ለበዳ ኮረና -ቫይረስ-19 ነቶም ምዕቡላት ህብረተሰብ ዓለም ከይተረፈ፡ ወላእላእ ዘበለትን ዝቀዘፈትን እያ።  ንዓና ነቶም ድያስፖራ’ዉን  ኣይጎሰየትናን። ካባና ግን፡  እቶም ኣብ ካልእ ሃገር ከም  ስደተኛታት ኮይኖም  ተዓቂቦም ዘለዉ ፡ ብዝያዳ ተሃስዮም። እዚ ኾይኑ ግን፡  እቲ ዋና ኣሰካፊ ዝነበረ፡ ኩነታት ህዝብና  ኣብ ዓዲ ዘለዉ፡ ከብዶም እኳ ዘይጸገበ፡ እፎይ ኢሎም ዘይሐድሩ፡ ስንኩል ሕክምና ዘለዎም፡ ብጨካን ርእሰ መላኺ ኢሳያስ ኣፈወርቂ  ተረጊጾም ዝነብሩ’ዮም። ኮይኑ ግን፡  ነቲ ሕሰሞምን፡ ድኽነቶምን፡ ውርደቶምን ኣምላኽ ርእይሎም ግዲ ኾይኑስ፡  እቶም ብ ኮረና ቫይረስ -19 ተለኺፎም ዝሞቱ፡  ቁጽሮም ከምቲ ዝፈራሕናዮ ኣይኮነን።

ካልእ ድማ፡ ኣብ 2020፡ ኣብ መንጎ ብዶክቶር ኣብይ ዝምራሕ ፈደራላዊ መንግስቲ ኢትዮጵያን፡ ክልል ትግራይን ዝግበር ዘሎ ዉግእ፡ ኢሳያስ ምስ ዶክትር ኣብይ ተሻሪኹ መንእሰያት ወታሃደራትና – ገሊኦም ናይ ኩናት ተመክሮ ዘይብሎም –   ኣብ ቅድመ ግንባር ናይ ኣብይ ወታሃደታት ኮይኖም፡ ኣንጻር እቶም ኣስታት 95,000 ዝኾኑ ስደተኛታትና ኣዕቂቦሙልና ዘለዉ አሕዋትናን፡ ጎረባብትናን  ተጋሩ ተዋጊኦም። ልክዕ ቁጽሪ ዘይንፈልጦ ከኣ ሞይቶም ይባሃል ኣሎ።  ሰራዊት ትግራይ ካብ ከድተማታት ኣዝሊቆም።  እቶም ተረፍ ሞት ወታሃደራት ኤርትራ ድማ፡  ዝመቱ ተባሂሎም  ኣብ መቀለ ይኹን ኣብ ካልእ  ከተማታት፡ ዘሚቶም ክንደይ ዕንወት ገይሮም ይባሃል  ኣሎ። እዚ እንተድኣ ሐቂ ኾይኑ፡  መሪር ቅርሕንትን፡ ጽልእን ዘኸትል ናይ ከቢድ ከቢድ’ዩ!  ህዝቢ ኤርትራ ደላይ ሰላም’ዩ፡ ንሰላምን ፍትሕን ድማ እዩ ን 30 ዓመታት ዝተቃለሰ። ዕድልና ገይርዎ ግን፡  ርእሰ መላኺ ጨካን ኢሳያስ ኣፈወርቂ፡  ብዘይነገርን፡ ጽልእን፡ ኩናትን  ክነብር ስለ ዘይክል፡ ልኡላዊት ሃገርና፡ ገና ከየስተማቀርናያ ከለና፡ ምስ ጎራባብትና  –   ብየመን  ጅሚሩ –  ተላኺፉ፡  ኩናት ክጅምርን  ሓደ ኾይኑ።። 

ክቡር ህዝቢ ኤርትራ፡ “ሕጂ’ሞ እንታይ ክንገብርን ኢና”  ንዝብል ሐተታ ፡  እዘን ኣብ ታሕቲ ዘርዚረይን  ዘሎኹ ነጥብታት እንተተኮርናለን ሐገዝቲ ኮይነን እስማዓኒ፡ 

ቀዳማይ፡ ኣብ ሞንጎ ክልል ትግራይን፡ ፈደራላዊት መንግስቲ ኢትዮፕያን ፡ ኩናት ምስ ተጀመረ፡ ብቀዳምነት  ግዳይ ዝኾኑ ፡ እቶም ኣብ ትግራይ ዘለው ስደተኛታትና – አንስትን  ቆልዑን  ብብዝሒ ዘለዎም –  እዮም። ከመይ እቶም ዘማሐድርዎም ዝነበሩ UNHCR፡  ኩናት ምስ ተላዕለ ሐዲጎሞም ከይዶምስ፡ ጥሜት ተላዒሉ ሕማም ውን ምስኡ ይጅምር ኣሎ፡፡ ግዱሳት ኤርትራውይን፡ ሐገዞም ይውፍዩ ኣለው፡ ዝኣክል ግን ኣይኮነን። ስለዚ ሂወት ንምድሓን  ኩላትና ዳያስፖራ ፡ ምስቶም ድሮ ዝሰርሑ ዘለዉ ተዋሃሂድና ብኹሉ መዳይ ክንሕግዝን፡  ዓለምለኻዊ ሕጊ ስድተኛታት ኣብ ግብሪ ክውዕልን ክንጽዕር ኣለና።

ካልኣይ፡ እዚ ዕንወት ሰብን ሃገርን፡ ጨካን ኢሳያስ ኣፈወርቂ በይኑ ኣይዉንጀልን እዩ። ንሕና ከምዛ  ዋዛ፡ ብዘይጠቅም፡ ብቀንጠመንቲ ተፋላሊና። ኣውራጃ ይባሃል፡ ብቀዳምነት፡ ሃገር ከይሐዝካ ኣውራጃ ኣይርከብን’ዩ፡ አውራጃታትና ድማ ድሩዕ ስልማትና እየን። እቲ ሕግታት ምምሕዳር ሃገርና፡ ኣሽምባይዶ መሰል ሰብሲ፡ መሰል እንስሳ’ኳ ዝሕሉ፡  ኣብተን ክልተ ዓበይቲ ቅዱሳት መጻሕፍቲ ምስልምናን፡ ክርስትናን ዝተመኮሰ እዩ።  እቲ  ኣብ ቤት ፍርዲ ዓለም ቀሪቡ ክፍረድ ዝግብኦ  ገበነኛ  ኢሳያስ ኣፈወርቂ ፡ ሰሚርና “ሑሕ” እንተንብሎ፡ ንሱ ምሃደመ እምበር፡ ንሕና ዓበይትና ንኣሽቱና፡  ስድራ ቤት ተፋላልያ፡  ዓድና ገዲፍና፡ ኣብ ስደትን፡ ኣብ ሓሳረ  መከራን ኣይምኣተናን። ንሱ  ሙሞተ እምበር፡ እቶም ካብ ባሕርና ገፊፍና ክንበልዕም ዝግባኣና ዓሳታት፡  ተመሊሶም ቀለቦም ኣይምገበሩናን።

ሳልሳይ፡  ልብና ተሪሩ።  ከምቲ ሓደ ሰብ ኣብ ምጋሹ፡  ኣብ መንገዲ ሬሳ ተደርብዩ ምስ ረኣየ ዝሐዝን፡ ዝሕግዞ ክረክብ ቁሊሕ ሚልሕ እንተበለ ድማ፡ ስጉምቲ ከይከደ ፡ብየማን ብጸጋም ሬሳታት ምስ ረኣየ፡ ዓይኑ ለሚድዎ፡ ስቅ ኢሉ ዝምርሽ፡ ንሕና ድማ፡ ነብሰይ ነብሲ’ማተይ በብጊዝኡ ኣብ ባሕሪ ጥሒሎም፡ ንስደት ክኸዱ ኣብ  መንገዶም  ከም ባዓል ሲናይ፡  ልቦምን ኮላሊቶምን  ይውሰድ ኣሎ፡  ካብተን እተን ንጽባሕ አዴታት ዝኾና ኣዋልድ፡ ኣብ ሳዋን፡ ኣብ መንገዲ ስድተንን ይዕመጻ’ሞ ወይ ርእሰን ይቅትላ፡ ወይ ድማ ኣቡኡ ዘይፈልጥኦ ሕጻን ሒዘን፡ ኣብ ስደተን ለማኖ ኮይነን ከንሰምዕ  ኮለና፡  ንሐዝን፡ “ዋይ ንሕና፡ ከምዚ ዲና ኮይና፡ እንታይ ጉዱ እዩ፡ ድሕሪ ክንድዚ መስዋእትን፡ ስደትን፡ ኩሉ ሓሳረ መክራንሲ፡ እዚ’ዩ ዕድልና” ኢልና ንግዚኡ ሐድ ሐደ ነገራት ንገበር፡ ቅሩባት ሰባት ድማ ከይትሓለሎም፡ ይስርሑ። እንተኾነ ከምቲ ረቂቅ ነጸላ ብኽረምቲ ብዙሕ ዘይጠቅመካ፡ እቲ ነወፍዮ ድማ ኣዚ’ዩ ድሩት እዩ። ርግጽ’ዩ ናብራ ወጻኢ፡ ብሕልፊ ኣመሪካ ከቢድ’ዩ። እንተኾነ ዋና ጸላኢና፡ ማዕረ ፍጹም ክጽንተና ዝጓየ ዘሎ፡ ጨካን፡ ርእሰ መላኺ ኢሳያስ ኣፈወርቂ – ምስቶም በብእዋኑ ዝምልምሎም ሰዓብቱ  –   ከም ዝኾነ መዓልቲ፡ መዓልቲ  እናዳዘከርና፡ እቲ ብዉሑዳት ሰባት ዝግበር  ዝነበረ  ሐልዮት ኣብ ዘለዉ ይሃልዉ ህዝብና –  እታ ናይ  ሐቂ ጽሓይ ኪሳብ ትበርቀልና – ኩላትና  ተሳኒና ምስ ንዓሞ፡  ካብ እተጸበናዮ ንላዕሊ  ክንዕወት ንኽእል ኢና ዝብል እምነት ኣሎኒ።

ራብዓይ፡      ኣቱም መንእሰያት ደቅና፡  ወለድኹም ዝተሰውኡን፡ ክንደይ ስቃይ ዘሕለፉን፡ ንስኻትኩም፡ ተማሂርኩም፡  ኣብ ዝብጻሕ በጺሕኩም፡ ዋናታት ሃገርኩም ኮንኩም፡ ኮሪዕኩም፡ ብሰላም ንኽትነብሩ’ዩ። ይዋእ ደቀይ፡ ከምኡግን ኣይተረኽበን።  ኣብ ካልኣይ ውግዕ ዓለም 6,000,000 እስራኤላዉያን ሞይቶም። ክትግምትዎ ትኽእሉ፡ ስድራ ቤታት ፋሕ ፋሕ ኢለን። ካብ ሞት ዝተረፉ መንእሰያት መብዛሕትኦም ኣዲኦምን፡ ኣቦኦምን፡ ኣዝማዶምን ክረኽቡ ዘይከኣሉ፡ ሃዲሞም ኣብ  መገዶም  ጓሶትን፡ ናይ ገዚ ስራሕተኝታትን እናኾኑ፡  ድሕቲ ዓመት፡ ክልተ ዓመት፡  አመሪካ ኣትዮም። ዝገበሩ ጌሮም ዓቅሞም ተማሂሮም። እቶም ገንዘብ ዝገበሩ ድማ ዓዲ ወለድና፡ ዓድና  ኢሎም ንእስራኤል ምህናጽ ዓቢ ተራ ተጻዊቶም.። ብዙሕት ካባኻትኩም ካብ ሞትን መከራን ኢኹም ወጺእኩም። ንስኻትኩም ድማ ኣጆኹም እዞም ደቀይ፡ ከምዞም እስራኣላዉያን ኣብ ዓውት ክትበጽሑ ትኽእሉ ኢኹም። ኣብ  social media  ንዝጻሓፈ ክትምልሱ ወርቃዊ ጊዜኹም ኣይተጥፍኡ።  ዕለት እንጌራኹም ክትረኽቡ እናሰራሕኩም ክትማሀሩ ትኽእሉ ኢኹም። ክሕቡሩኹምን፡ ክሕገዝኹምን ዝኽእሉን ዝደልዩን ኤርትራዉያን፡ መማሃራን ደቂ  ኣንስትዮን ደቂ ተባዕትዮን ኣለዉ። ኣጆኹም እዞም ደቀይ በይንኹም ኣይኮንኩምን።

ክቡር ህዝቢ ኤርትራ፡

እምብኣር እዘን እብ ላዕሊ ዝስመኹወን ነጥብታት፡ ኣቃልቦ ክዉሃበን  እትስፎ። ደጊመ ደጋጊመ ድማ፡፡ እዛ ሓዳስ ዓመት 2021፡ ዓመት ሰላም፡ ዓመት ፍቅሪ፡ ዓመት ጥዕና፡ ዓመት ኣብታ ንናፍቃ፡ ኣማዕዲና ንርእያ ዘለና ቅድስቲ ሃገርና ንምለስ፡ይግበረልና እናበልኩ መልእኽተይ ኣብዚኣ እዓጹ።፡ ክብርን ምስጋናን ድማ ከም ወትሮ ንዕኡ ንእግዚኣብሂር  ኣምላኽና ይኹን። አሜን።

የቀንየለይ

ኣበባ