ብርሃነ ወልደገብሪኤል፡ ብ7 ጥሪ 1946 ዓ.ም ኣብ ዓዲ ጭጉኑ ወረዳ ቖሓይን ተወሊዱ ኣብ ኣስመራ ዓብዩ።
ወላዲኡ ኣብኡ ተለንተ ወልደገብሪኤል ወልደገርግሽ፣ ኣዲኡ ድማ ወይዘሮ ትበርህ ኣዳነ ኮይኖም፡ ብርሃነ ኣብ ኤርትራን ኢትዮጵያን ተማሂሩን ኣስተምሂሩን።
ወዲ ፖሊስ ብምንባሩ ኣብ መዘናታቱ ብወዲ ሓላው ወሰን ዝፍለጥ ብርሃነ ኣብ ከተማ ኣስመራ ኣብ ሰምበል ዓብዩ።
ኣብ ዝተፈላለያ ከተማታት ኤርትራ፡ ጎዳይፍ፡ ካምቦኒ፡ ሳንጀርጆ መንደፈራ፡ ልኡል መኮነን ኣስመራ ተማሂሩ።
ናይ 2ይ ደረጃ ትምህርቱ ምስ ወደአ ከኣ ኣብ ደብረ ብርሃን ናይ መምሃራን ስልጠና ወሲዱ፤ ኣብ ከፋ ንሰለስተ ዓመት ምሂሩ።
ኣብ ዩኒቨርሲቲ ኣዲስ ኣበባ’ውን ታሪኽን ስነ-ትምህርትን ኣጽኒዑ።
ትምህርቱ ምስ ወድአ መምህር ክኽውን ባህጊ ከምዝነበሮ ብ 2017 ምስ ኣሰና ኣብ ዝገገበሮ ዝርርብ ዝገለጸ ብርሃነ፡ ኣብ ከተማ ኣቑርደት ከም ኣገልግሎት/ ሰርቪስ ንሓደ ዓመት ኣብ ካምቦኒ ፖርት ሱዳን እውን ንሓደ ዓመት ምሂሩ ።
ብድሕሪኡ፡ ኣብ ሚኒስትሪ ዜናን ባህልን መንግስቲ ሱዳን ኣብ ካርቱም ንሸውዓተ ዓመት ሰሪሑ።
ካብኡ ኣብ መዓስከራት ስደተኛታት ናይ ዜናን ርክብን ኣወሃሃዲ ኮይኑ እናገልገለ፡ ኤርትራውያን ስደተኛታት ብሕጽረት መግቢ ክሞቱ ምስ ጀመሩ፡ ብርሃነ፡ “እቲ ንስደተኛታት ተባሂሉ ዝመጽእ ዘሎ እኽሊ ኣብ ስደተኛታት ኣይበጽሕን ዘሎ” ክብል ኣብ ኦክስፎርድ ዓባይ ብሪጣንያ እትሕተም መጽሔት ረፉዩጂ ስታዲስ ምስ ጽሓፈ ብመንግስቲ ሱዳን ተኣሲሩ። እንተኾነ ድሕሪ ሓጺር እዋን ጉዳዩ ክጽናዕ ክጻረን ኣለዎ ተባሂሉ ተፈቲሑ።
ዕድል ገይሩ ከኣ እታ ዓንቀጹ ዘሕተመት ኣብ ዓባይ ብሪጣንያ ዝመደበራ መጽሔት ስለ ዝተሓበበረቶ ንዓዲ ኢንግሊዝ ኣትዩ ኣብ ዩኒቨርሲቲ ሶኣስ ለንደን ቋንቋ ትግርኛ እናመሃረን ክሳብ ዕለተ ዕረፍቱ ንስደተኛታት ኣብ ምሕጋዝ ክነጥፍ ጸኒሑ።
ብርሃነ ወልደገብሪኤል ጎኒጎኒ እቲ ዝተጠቕሰ ንትፈታቱ፡ ምስ ብጾቱ Eritrean Education and Publication Trust ዝብል ናይ ግብረሰናይ ትካል ብምምስራት፡ ንኤርትራውያን ስደተኛታት ብሓፈሻ ኣብ ልዕሊ ምትሕጋዝ፡ ብፍላይ ኤርትራውያን ፖለቲካዊ ውድባትን ሲቪክ ማሕበራትን ተሳንዮም ብሓባር ዝሰርሑሉ መድረኽ ብምፍጣር ዓቢ ኣበርክቶ ገይሩ።
ሓደ ብኣብነት ዝጥቀስ ኣጋጣሚታት፡ ካብ 4-5 ሰነ 2011 ብመሪሕነት ብርሃነ Eritrean Education and Publication Trust ዝወደቦ ፖለቲካውያን ውድባትን ሲቪክ ማሕበራትን ኤርትራን ኣህጉራውያን ክኢላታትን ዘሳተፈ፡ ተመክሮ ጎረባብቲ ሃገራት `ውን ዝዳህሰሰ ናይ ክልተ መዓልቲ ፍሉይ ዋዕላ እዩ።
ብርሃነ፡ ድሕሪ ተረኽቦ ሓደጋ ላምፔዱሳ ስደተኛታት ኣብ ምድሓን ምስ ዝተዋፈረት ብትካል ሕጻናት ኣድሕን (ሰይቭ ዘ ቺልድረን) ምስ እትካየድ መርከብ ንሒደት ኣዋርሕ ኣብ ማእከላይ ባሕሪ ብምስራሕ ሓያሎ ስደተኛታት ኣብ ምድሓን ሕልናዊ ሓላፍነቱ ዝተዋጽአ ሰብ እዩ።
ንነዊሕ ዓመታት እትፈልጦ ተጋዳሊት መርየም ዑመር፡ ንብርሃነ፡ “ንባህልን ልምድን ብሄራት ኤርትራ ብዕምቆት ዝርዳእ ምስ ኩሉ እምነታት ጽቡቕ ፍልጠት ዘለዎ፡ ለዋህ ርህሩህ፡ ህዝቢ ክጠምር ዝጽዕር ኣካብን ሓቛፍን ሰብ እዩ ነይሩ” ክትብል ንቢቢሲ ትግርኛ ሓቢራ።
ዓሊ ህንዲ ብወገኑ፡ ብርሃነ ” ንኹሎም ገዳይም ፖለቲከኛታት ኤርትራ ክዓርቕን ከላግብን ኣብ ኤርትራ ዕርቀ ሰላም ተኣዊጁ፡ መኣዲ አሕዋት ተሰሪዑ ክርኢ ዝደሊ ጻዕራም ሰብ እዩ ነይሩ” ክብል ቀረባ ዓርክን መሓዝን ብምስኣኑ ሓዘኑ ይገልጽ።
ዜና ዕረፍቱ ኣብ ማሕበራዊ ሚድያ ምስተቓልሕ ብዙሓት አዕሩኽቱን ፈለጥቱን ዝተሰመዖም ከቢድ ሓዘን ይገልጹ ኣለው።
ብርሃነ እምበኣር ናይ ብሓቂ ክፉት ኣእምሮ ዝነበሮ፡ ንነገራት ኣስፍሕ ኣቢሉ ዝርኢ፡ እፈልጥ እየ ኢሉ ዘይዕበ ወትሩ ትሑትን መኽበሪ ሰብን እዩ ነይሩ።
ንመዋቲ ብርሃነ ወልደገብሪኤል መንግስተ ሰማያት የዋርሶ፡ ንፈተውቱን ምሉኣት ስድራቤትን ጽንዓት ይሃብ።
በዚ ኣጋጣሚ፡ ምስዚ ዝንህር ዘሎ ካልኣይ ዙርያ ለበዳ ኮረና ቫይረስን ከሪሩ ዘሎ ቀይድታት ምንቅስቓስ መንግስቲ ኣብ ለንደንን ካልኦት ከባቢታትን፡ ከምንቡር ቤተሰብ መዋቲ ምብጻሕ ኣጸጋሚ ስለዝኾነ፡ ክሳብ ንስነስርዓት ቀብሩ ዝምልከት ዝርዝር ሓበሬታ ተዋዲዱ ዝዝርጋሕ፡ በዚ ዝስዕብ ቴለፎን ንቤተሰብ ምጽንናዕ ይከኣል – 07506226599
ኣብ ክንድኡ ኣብ ትሕቲ“ዚ ትሕዝቶ“ዚ ናይ ሓዘን መልገጺ ምስ እትገድፉ `ውን ድሕሪ ዝተወሰነ ግዜ ሓብ ሓደ መዝገብ ሰኒድና ንስድራቤቱ ከነመሓላልፈሎም ምዃና ነዘኻኽረኩም።
ደጊምና መንግስተ ሰማያት የዋርሶ ንብል።
ክቡር ሓወይ ዓርከይብርሃነ: ዓለም አርኪባትከ
ዝጀመርካዮ ሃገራዊ ዕማም ከይወዳእካ:: ዝክአለካ ገርካ ጽበቕ ስምገዲፍካልና:: ዕላልካ ጥዑም ትምህትኻ ሰፊሕ: ከም ፈልፋሊ ማይ ሰቲኻ ዘይጽገብ:: ንዳሕራይ ተደሊኻ ዘይትርከብ: ለባም: ፈቃር: ፍትሓዊ: ለጋስ መልትዓኻ: አብዓለም አኺሉ ብሰላም ዕረፍ:: ንስድራ ቤትጽንዓት ይሃብኩም::ዝፈውኻ!
ሂወት ዮሃንስን
ሃይለ ገብረትንሳኤ
ኢንድያናፖሊስ ኢንድያና
ሰሜን አመሪካ